له ڕووژ پهنجشهمه 31.05.2007 دیدارێک دووستانه له مابهین کومیتهێ حزب دموکرات کوردسان ئێران (پدکی) وجونبش دموکراتیک یارسان (جدی) له نوروژ، له شار ئوسلوو وه ئهنجام ڕهسی. مێواندار ئی دیداره PDKI بی که ئستقباڵێک گهرم له JDY وه ئهمهڵ هاورد.
بهرپرس کومیتهێ حزب له نوروژ، بهڕێز کاک ئبراهیم لاجانی سهرهڕێ خهیرهاتن کردن، ئهرا جاریکتیر پیرووزبایی ئهڕا دامهزراندن جدی کرد. کاک ئبراهیم له سهر ئی باوهره بی که ئهو حهرهکهت یارسانیه، حهرهکهتێکه زهرووری و پیرووز و توانێ له ئایهندهێ کوردسان و ئێران، هێزێک بووت که له پرووسهێ وه جێخستن دموکراسی و له بهین دایین ستهم نهتهوهیی و موبارزهێ دژ وه دوتهواوهتی نهخشێک کارساز داشتووت. له ئدامهێ گوفتارهکه ئهو بهریزه وهت، کوومهڵگاێ یارسان جوور بهشێک له کوومهڵگاێ کوردهواری هوویهت تاێبهت وه خوهێ دێرێ که سهرهڕاێ ستهم ملی دوچار ستهم ئایینیچ له دیور زهمانوه بیه و ههر وه ئی خاتره یهک ڕێکخریاگ یارسانی دیور له ئنتزار وه چشتێک غهریب نهوییه. له ئدامهێ ڕاوێژهکان له لاێهن بهڕێزانێکتر که بهشدار دانیشتنهکه بین له سهر ئهوه باس کریا که جدی توانێت له وهڕێوه بردن ئهرک موبارزهێ ملی، جوور یهک تهشهکول موستهقڵ هاوپهێمان وهزنهدارێک بووت ئهڕا حزب دموکرات کوردستان ئێران له رێ موبارزهی نهتهوهیی. ههر وه ئی جووره باس له ئیه کردن که دیوری جدی له حزب لهتمهێکه له ئهو حزبه و له نهتهوهێ کورد. بهرپرس کومیتهێ حزب له ئی باوهڕه بی که کوومهڵگاێ یارسان توانێت له چوارچوو بهرنامهێ حزب دموکرات قانجازهکان خوهێ بوینێتوه و داواکار نزیکاێهتی بێشترێک له بهین ئهو کوومهڵگا و حزب بی.
نمایهندهگهل جدی، که هامێتهێهک بین له ئهندامگهل کومیتهێ مهرکهزی و کومیتهێ شاخهێ نوروژ، خوهشهاڵی خوهێان ئهڕا ئی دیداره دهربڕین و ئهڕا ئسقباڵ گهرمێک که له لاێهن حزب وه بوونهێ دامهزراندن جدی کردیا، قهێرزانی کردن. له سهرهتاوه بهڕێز کاک حوسهین خهلیفه جوور ئهندامێک له کومیتهێ مهرکهزی جدی، ڕهوشهنگهریهلێک له سهر بنهواێ دامهزراندن جونبش دموکراتیک یارسان و سیاسهته گشتیهکان و له سهر ئیهێ که وه ڕێخستن جهریانێک یارسانی تهنیا وه مهبهست یهک دهنگ کردن نێرووگهل یارسانی له موبارزهگهل جوورواێجوورێکه که له وڵات ئیمه وهڕێوه چووت، گوفتارێک پێشکهش کرد. ههر ئهوجوره وهت که موبارزهێ نهتهوهی، موبارزهێ دموکراسی تهڵهبی، موبارزهێ دژ و تهبئیز جنسی و ئایینی یهکی له مهێدانگهلێکه که مهردم یارسان باێهت جوور یهک تهشهکوڵ، وه هێز گهوراێکوه له تێ بهشداری بکهن. وه ڕێخستن جونبش دموکراتیک یارسان گامێکه ئهساسی ئهڕا له هاشیه دهرهاتن و هوویهتیابی و وهدهس هاوردن مافهکان کومهڵگای یارسان. ئهندامگهل جدی پا له سهر ئی راسیه داگردن که شهرت هاوکاری له بهین جهریانهکان، ها له وه ڕهسمیهت ناسین ئستقڵاڵ تهشکیلاتی یهکانتر، که ئیه خوهێ بناخهدانهر و ڕێ خوهشکهر چالاکیه سیاسی و کوومهڵایهتیه هاوبهشهکانتره.
له ئدامهێ گوفتگووهکانه له سهر بهرنامه و ئهساسنامهێ جدی باس کریا که ئهندامگهل کومیتهێ حزب له سهر ئی اوهڕه بین که خاڵێک نگه رانی سازکهر بوود، له ناو بهرنامهێ جدی ناوینن و فره له ههدهفهکان که له ئهو بهرنامه هاتگه ههر داخوازیهکان ئهوانیچه. له دریژا باس له سهر ئیهیچه کریا که جدی جوور یهک تهشکیلات نهوپا خهریک ڕابته دروس کردن وه گهرد جهریانگهل موتهرهقی و دموکراته. دروس بیین ئی پهێوهدیهله تا رادهێ فرهیک بهستهگی وه بهرخورد و پێشوازی ئهوان له جدی جور یهک ریکخریاگ سهروهخوهی دیرێت.
بهرڕهسی زهمینهگهل هاوکاری و چوینیهتی ئهوه خاڵگهلێک بی که له لاێهن ههردوک لاوه وه وردی باس له سهرێ کریا، که له ئهوانه فهئالیهتگهل هاوبهش، جوور گرتن سهمینار، دیدارگهل تلویزیوینی، خوهینیشاندان و چالاکیه سیاسی و کومهڵایهتیهلێکتر. ههر وه ئیجووره ئاڵووگووڕهکان چهوهرێکریاگ ئایهنده له ئێران و کوردسان و ههر ئهو جوره سیستم ئداری موناسب که جواوگوو نیازگهل سیاسی نهتهوه و چینه جورواجورهکان بوود، خاڵگهلێک بین که له دریژای ئهو دیداره خریانه وهر چهو.
بهشدارگهل ئهو دیداره له ڵایانPDKI به ریزان ئبراهیم لاجانی، قادر ئهلیاسی، ساڵح ولیزاده، سمکۆ ئیسماعیلزاده و ئهمیرئهلیاسی و له لایان جونبش دموکراتیک یارسان ،رێزدارگهل، حوسهین خهلیفه، هیوامرادی، هوماعهسکهری، مهجیدبابایی، مهجید کازمی و شفا یارموردای بین.
ئیه دیداره له بهین کومیتهێ حزب دموکرات کوردسان ئێران و جونبش دموکرایک یارسان فره وه خوهشی و ڕهزامهندی ههردوک لا وه ئاخر ڕهسی، و دیدارێک زهرووری و مهوهفهق ئهڕا خوهش کردن ڕچه و ڕێواز هاوکاریهل نزیک له بهین ههردوک لا له قهڵهم دریا.
کومیتهێ جونبش دموکراتیک یارسان له نوروژ
ئوسلوو، 01.06.2007
Date: 4 Jun 2007 Views: 514
Print
